Претседателот на ЗНМ Насер Селмани ја обвини владата дека сака да ја озакони новинарската етика, а со тоа да воведе цензура во медиумите.
„Велите дека поддржувате саморегулација во медиумите, а со членот 61 сакате да ја озаконите новинарската етика, со казни од 5.000 евра за медиумот и 1.500 за одговорното лице, тоа е воведување цензура. Дополнително, не ви пречеше во 2016 да поддржите 1% од буџетот за Јавниот сервис, а сега предвидувате 0,7% од буџетот. Ако МРТВ има долг од 30 милиони евра како планирате Вие со 15 милиони евра годишно да отворите нов канал на МРТВ, да ја опремите, да исплатите плати за вработени а камо ли за дигитализација?, рече Селмани на дебата за медиумски реформи.
Најмногу критики беа упатени за обврската за медиумите да емитуваат 50% македонска музика, додека претставниците на приватните медиуми го поздравија предлогот за ослободување од оваа обврска со член 92, здруженијата за заштита на авторски права реагираа дека треба да се заштити домашното производство.
Од владата велат дека ова не е финална верзија на законот, туку дека се уште има можност за предлози и забелешки.
„Наша цел е да де подобри медиумската сфера, а улогата на владата во тоа да биде минорна. Имаме цел да се департизира Јавниот сервис и Агенцијата за медиуми. Планираме еднаш месечно преку работна група на невладини и владини претставници да следиме како ќе се спроведува законот“ изјави министерот за отчетност и транспарентност Роберт Поповски.
Предлог законот ќе биде отворен за увид на ЕНЕР до крајот на месецот а од владата потенцираа дека нема да брзаат со законските решенија, туку ќе ги слушнат сите засегнати страни.
