Семејството Гучи се закани на продукцијата на филмот „House Of Gucci“ со тужба поради начинот на кој се портретирани во новиот филм на Ридли Скот, а особено претставувањето на Патриција Реџани - „Црната вдовица“ како жртва.
Наследниците на Алдо Гучи (го игра Ал Пачино во филмот) тврдеа дека „продукцијата на филмот“ не „се обидела да ги консултира“ пред да ги опишат претседателот на компанијата и „членовите на семејството Гучи како насилници, неуки и нечувствителни на светот околу нив“.
„Ова е крајно болно од човечка гледна точка и навреда за наследството на кое денес се гради брендот“, се наведува во соопштението кое вчера го објави италијанскиот телевизиски сервис ANSA.
Лејди Гага ја игра Патриција Реџани, која помина 16 години во затвор поради планирање на убиството на нејзиниот поранешен сопруг и поранешен шеф на модната компанија, Маурицио Гучи (го игра Адам Драјвер).
Наследниците, кои ја водеа модната куќа Gucci 33 години до средината на 80-тите, беа особено навредени од прикажувањето на Патриција како жртва, и покрај тоа што таа беше „осудена дека е поттикнувач на убиството на Маурицио Гучи“. Националните медиуми ја нарекоа „Црна вдовица“.
Претставувањето на Реџани како „жртва која се обидувала да преживее во машка и мачо корпоративна култура е уште понепријатно“, се вели во соопштението.
Не само во филмот, ваквото сочувствително портретирање на Патриција се протега и во изјавите на членовите на актерската екипа, наведуваат наследниците на Гучи во нивната изјава, која наголемо беше цитирана од италијанските медиуми откако беше објавена.
Во неодамнешното интервју за британски Vogue, Гага рече дека не сака да „велича некој кој би извршил убиство“ преку нејзиното портретирање на Реџани, туку дека сака да им „оддаде почит на жените кои станале експерти за преживување низ историјата“.
Семејството го отфрли тврдењето во филмот на Ридли Скот дека компанијата не ги вклучувала жените.
Истакнувајќи ги овие неточности, се вели понатаму во соопштението, „семејството Гучи го задржува правото да преземе каква било иницијатива (неопходна) за заштита на своето име и имиџ“.
