Откако новинарите на германскиот весник Die Aktuelle направија скандалозно и лажно „ексклузивно“ интервју со седумкратниот светски шампион во Формула 1, Михаел Шумахер, семејството на легендарниот возач е подготвено да го тужи таблоидот.
И додека не се знае вистинската состојба на Шумахер, бидејќи семејството ја штити неговата приватност, внимание привлече насловот со задебелени букви на насловната страница на магазинот Die Aktuell: „Михаел Шумахер: Прво интервју“.
Меѓутоа, зад целата акција стои лажен разговор, во кој уредниците на магазинот Die Aktuell користеле вештачка интелигенција за да ги формулираат одговорите на прашањата за интервјуто.
Само како мал показател дека интервјуто е лажно, додатокот „Звучи измамнички реално“ може да се најде под задебелениот наслов со мали букви.
Во текот на лажното интервју, Шумахер „конечно дава одговори“ дали, на пример, во иднина ќе се враќа во јавноста и какво е неговото здравје.
Вештачката интелигенција одговори дека Шуми „може да издржи со помош на најблиските и дека без поддршката на неговото семејство немаше да преживее толку тешки години“.
Семејството на Шумахер за агенцијата Reuters потврди дека планира тужба, а многумина овој потег на таблоидите го оценија како невкусен и бесчувствителен.
И фановите на Михаел Шумахер беа шокирани од потегот на таблоидот и гневот го истурија на социјалните мрежи и го осудија срамното однесување.
Да потсетиме, седумкратниот светски шампион тешко се повреди на 29 декември 2013 година, додека скијаше на француските Алпи, удирајќи со главата во карпа.
Иако носел скијачка кацига, се здоби со тешки повреди на главата и беше пренесен во болницата во Гренобл каде беше опериран и ставен во индуцирана кома.
Единствените изјави што ги слушнавме во изминатите девет години од неговата менаџерка Сабине Кем се од општа природа и велат дека неговото семејство се обидува да направи сè за Михаел Шумахер да се опорави и дека бараат од јавноста да ја почитува нивната приватност.