Тенис

Сензација во Индијан Велс, Мареј елиминиран

12. март 2017 - 14:12 | Макфакс

Канаѓанецот Васел Поспишил приреди вистинска сензација со победата над Енди Мареј на стартот на Мастерс турнирот во Индијан Велс.

Поспишил, кој се наоѓа на 129-то место на АТП листата, по речиси два часа игра успеа да го совлада првиот светски рекет со 2:0 (6:4, 7:6).

Мареј и покрај тоа што победи во Доха пред две недели, само потврди дека е далеку од формата во која беше во финишот на минатата сезона кога се искачи на првото место на АТП листата.

Британецот во првиот сет два пати ја испушташе предноста на брејк, а Поспишил првиот сет го освои со четири гема во низа, кога од 2:4 стигна до 6:4.

Во вториот сет двајцата направија по еден брејк на самиот почеток, потоа беа сигурни кога сервираа, а во тај брејкот Поспишил експресно стигна до 6:2, а потоа и до победа.

И покрај поразот на стартот во Индијан Велс, Мареј ќе загуби само 20 бодови, бидејќи лани на овој турнир испадна во третото коло. Најголемиот успех Мареј во Индијан Велс го забележал во 2009 година кога загуби во финалето од Рафел Надал.

Поспишил во наредното коло ќе игра против Србинот Душан Лајовиќ, кој низ квалификациите се пласира на главниот турнир.

Коментирај