Google се соочува со тужба во САД по обвинение за нелегално нарушување на приватноста на корисниците, по тврдењата дека компанијата следела што пребаруваат луѓето онлајн иако ја имале вклучено опцијата private mode.
Оштетените во групната тужба бараат најмалку 5 милијарди долари од Google и матичната компанија Alphabet.
Многу интернет корисници претпоставуваат дека нивната историја на пребарување не е следена бидејќи ја користат опцијата private mode, но од Google велат дека не е баш така.
Од Google негираат дека ова е нелегално и тврдат дека корисниците се извстени за податоците што се прибираат и кога се користи оваа опција.
Тужбата опфаќа „милиони“ корисници на Google кои од 1 јуни 2016 година пребарувале на интернет со вклучена опција private mode, велат од адвокатската компанија Boies Schiller Flexner што ја поднесе тужбата вчера пред федералниот суд во Сан Хозе, Калифорнија.
Опцијата incognito mode во прелистувачот Google Chrome им нуди на корисниците избор да пребаруваат на интернет без да биде зачувана нивната историја на пребарување на прелистувачот или на уредот што го користат. Но, веб-страниците што ги посетуваат може да користат алатки како Google Analytics за да го следат користењето.
Во тужбата стои дека Google „не може да продолжи со скришно и неодобрено собирање податоци од речиси секој Американец кој има компјутер или телефон“.
Жестоко негирајќи ги тврдењата, портпаролот на Google, Хозе Кастањеда, изјави: „Како што јасно нагласуваме секојпат кога ќе отворите нов incognito tab, веб-страниците можат да собираат информации од вашето пребарување“.
Од Google велат дека прибирањето на историјата на пребарување, дури и кога имате вклучено private mode, им помага на сопствениците на веб-страниците „подобро да ги проценат перформансите на нивната содржина, производи, маркетинг и повеќе“.
Иако опцијата private mode е достапна на Google веќе некое време, од Boies Schiller Flexner велат дека неодамна решиле да застапуваат тројца тужители со место на живеење во САД.
„Луѓето стануваат сѐ посвесни и позагрижени дека нивните лични комуникации се пресретнувани, прибирани, снимани или експлоатирани за профит на технолошките компании од кои веќе зависат“, стои во тужбата.