Министерот за надворешни работи на Русија, Сергеј Лавров, изјави дека поранешниот лидер на Исламска држава, Абу Бакр ал-Багдади бил американски изум.
Шефот на руската дипломатија гостуваше на руска телевизија, а во таа прилика даде осврт на смртта на Багдади, кој минатиот викенд беше убиен во воена операција во Сирија.
„Багдади беше американски изум. Нашето Министерство за одбрана даде соопштение за Багдади. Сакаме повеќе информации за тоа. Нашата војска работи на пронаоѓање дополнителни докази и повеќето од информациите за кои САД ги објавија ние не можеме да ги потврдиме“, изјави Лавров.
Тој даде осврт и на настаните по американската инвазија на Ирак.
„ИДИЛ почна да напредува по илегалната окупација во Ирак, пропаста на ирачката држава и откако Американците почнаа од затвор да ги ослободуваат екстремистите. Во таа смисла, Американците, ако навистина тоа го направиле, елиминираа некој чие претходно присуство го овозможија“, наведе Лавров.
