UFC борачот Доналд Серон ги освои срцата на сите љубители на MMA борбите кога во дуелот против Јенси Медеирос преку пример покажа како треба да се однесува еден фер борач и спортист.
Серон не сакаше да ја искористи нефер стекнатата предност и му пружи шанса на Медеирос да се врати во борбата.
Двајцата борачи разменија по само неколку удари бидејќи борбата само што беше започнала, кога Медеирос изгуби контрола над телото и падна на земја. Голем дел од борачите во оваа лига би сакале да го искористат тоа и веројатно би упатиле неколку удари кон паднатиот противник во рингот, но тоа не беше случај со Серон.
Серон му даде шанса на Медеирос да стане, воопшто не приближувајќи се кон него додека овој беше на земја.
Најпрво следуваше неверување, а потоа и позитивно изненадување од страна на публиката, но и од самиот Медеирос. Двајцата дури се поздравија пред да ја продолжат борбата.
На крајот од борбата Серон не зажали за овој потег, бидејќи тој го победи Медеирос со нокаут, но во услови кои беа фер, па затоа задоволството беше уште поголемо.
