Привремено решение на испразнетото тренерско столче во каталонскиот гигант ќе биде предводникот на Б тимот и поранешен играч на клубот, Сержи Баржуан и Есклуза.
Поранешниот лев бек седна на клупата на Барса Б во јуни годинава, а сега ќе има шанса да го води првиот тим како привремено решение по отказот на Роналд Куман. Управата на клубот го отпушти Холанѓанецот по новиот лош резултат - синоќа Барса загуби на гостувањето кај Рајо Ваљекано.
Сержи е дете на Барселона. Од свои 17 години е во клубот (1988 година) за кој настапуваше до 2002 кога последните три сезони од кариерата ги мина во мадридски Атлетико. Воедно е и поранешен репрезентативец на Шпанија со 56 настапи меѓу кои и учества на СП 1994, ЕУРО 1996, СП 1998 и ЕУРО 2000, како и на непризнатата репрезентација на Каталонија.
Тренерската кариера ја почна во 2009 во академијата на Барса, потоа две сезони го водеше Рекреативо Уелва, па следуваа кратки авантури во Алмерија и Мајорка пред да замине на двегодишна печалба во Кина во тимот на Чеџиан Гринтаун.
Од таборот на Каталонците очекуваат Сержи набрзо да се врати во Б тимот, штом се официјализира соработката со Чави.
Веќе денеска Сержи ќе го има првиот тренинг со првотимците, неговата официјална презентација ќе биде утре во 13 часот, а првиот предизвик ќе го има в сабота дома против Алавес.