Властите во Сеул и Пјонгјанг ќе истакнат заедничка кандидатура на Јужна и Северна Кореја за организација на Олимписките игри во 2032 година, иако Меѓународниот олимписки комитет (МОК) неодамна веќе му додели на австралискиот град Бризбејн статус на посакуван домаќин на Игрите.
Официјален Сеул, како што јавија јужнокорејските медиуми, објави денеска дека доставил до надлежната Комисија на МОК „предлог, визија и концепт за заедничка организација“ на ЛОИ со Пјонгјанг.
Јужнокорејските власти, притоа, изразија жалење поради „неочекуваната одлука“ на МОК да додели статус посакуван домаќин на Бризбејн, но порачаа оти се решителни во намерата да продолжат со процесот на кандидирање.
Летната Олимпијада во 2032 година ќе биде 35-то издание, а досега интерес за организација имаат пројавено и градовите Ахмедабад (Индија), Џакарта (Индонезија), Доха (Катар), Мадрид (Шпанија), како и германската појузна покраина Северна Рајна-Вестфалија со 13 градови и тоа Диселдорф, Дортмунд, Келн, Бон, Ахен, Дујсбург, Есен, Гелзенкирхен, Крефелд, Леверкузен, Менхенгладбах, Оберхаузен и Рекликгхаузен.