Северна Кореја соопшти дека го извела својот петти нуклеарен тест, пренесе BBC. По силниот потрес во близина на областа за нуклеарни тестирања, владините медиуми во Северна Кореја објавија дека е изведен тест на нуклеарна бомба.
Претставници на Јужна Кореја, сметаат дека се работи за најголемиот севернокорејски нуклеарен тест досега, а тоа предизвика страв дека диктатурата направила голем напредок во својата програма.
САД предупредија дека овој нуклеарен тест ќе има сериозни последици за државата, додека Кина соопшти дека апсолутно се противи на тестирањата и побара Северна Кореја да се воздржи од следни тестови.
Северна Кореја тврди дека успешно ја тестирала новата нуклеарна боева глава, која може да се постави на балистичка ракета.
Премиерот на Јапонија изјави дека нуклеарниот развој на Северна Кореја сериозно го нарушува мирот и безбедноста во регионот.