Официјален претставник за Северна Кореја изјавил за CNN дека оваа земја не е заинтересирана за дипломатија се додека не развие интерконтинентален балистички проектил со кој ќе може да го погоди источниот американски брег.
„Пред да започнеме да се занимаваме со дипломатија со администрацијата на Доналд Трамп, сакаме да испратиме јасна порака дека Северна Кореја има сигурна одбранбена способност за спротиставување на било каква агресија од Соединетите Американски Држави“, изјавил претставникот.
Критичната ситуација меѓу Северна Кореја ја коментираше и Ким Ин – Рјонг, заменик амбасадор на Обединетите Нации во Северна Кореја.
„Ако непријателската политика и нуклеарните закани од САД не бидат темелно искоренети, никогаш нема да се преговара околу нуклеарно оружје и балистички ракети“, изјави тој, пренесува Ројтерс.
Коментарите доаѓаат после дополнителното влошување на ситуацијата, земајќи го во предвид фактот дека американските и јужнокорејските сили изведуваат вежби на море и копно, што е провокација за Северна Кореја.
