Северна Кореја стана младински светски шампион - коментаторот мртов ладен

Фудбалерките на Северна Кореја на супериорен начин ја освоија титулата светски првак до 20 години постигнувајќи ги сите седум победи на Светското првенство што се одржа во Колумбија.

Во групната фаза Северна Кореја ги совлада Аргентина со 6:2, Костарика со 9:0, а Холандија со 2:0.

Во осминафиналето ја победи Австрија со 5:2, по што следеа три победи од 1:0 во четвртфиналето над Бразил, полуфиналето над САД и финалето над Јапонија.

Видеото од единствениот гол на Чое Ил Сон против Јапонија во 15-тата минута го обиколи светот.

И додека се навикнавме на арапски коментатори кои неконтролирано урлаат дури и кога пренесуваат натпревари на тимови и репрезентации кои се оддалечени илјадници километри од нив, севернокорејскиот коментатор на државната телевизија KCNA со сосема смирен тон констатираше дека неговата репрезентацијата постигна гол што на крајот ѝ ја донесе на Северна Кореја третата титула светски шампион во категоријата за фудбалерки до 20 години.

Нема сомнеж, а ова е уште еден доказ дека Северна Кореја навистина се разликува од другите земји во светот.