Северна Кореја го обвини претседателот на САД Доналд Трамп дека ја злоупотребува смртта на студентот Ото Вармбир.
Во соопштението, Пјонгјанг го нарекува Трамп „стар лудак“.
Вармбир во јуни годинава беше вратен во САД, откако помина 17 месеци во заробеништво во Северна Кореја поради кражба на хотелски знак, а почина неколку дена подоцна.
Завчера, Трамп тврдеше дека 22-годишниот студент бил „немилосрдно измачуван“ од таинствениот режим, а роителите на Вармбир рекоа дека бил „измачуван и деформиран“.
„Вармбир не трпеше малтретирање додека беше во притвор. Пјонгјанг му ја пружи сета неопходна здравствена нега, наспроти неговите непријателски делувања“, стои во соопштението од севернокорејските власти.
Северна Кореја на тоа одговори со обвинување кон САД дека го „намамиле и втурнале“ Вармбир во ситуација да ги прекрши правилата во земјата, а Министерството за надворешни работи додава дека му била дадена „мисија“ од „американска организација што прави заговор против Северна Кореја“.
„Трамп и неговата ‘багра’, за нивната антисеверокорејска кампања, повторно ја злоупотребуваат смртта на Ото Вармбиер. Фактот дека стариот лудак Трамп и неговата банда го клеветат светото достоинство на нашето врховно водство користејќи лажни, фабрикувани податоци, само ја зголемува омразата на нашата армија и нашиот народ кон САД и нивната желба 1.000-кратно да се одмаздат.“