Грчката влада вчера соопшти дека ќе го рестартира туризмот од 15 јуни, а од 1 јули ќе дозволи меѓународни летови.
Соопштението од Грција следеше откако министрите за туризам од земјите членки на ЕУ се согласија да направат „сѐ што е потребно за брзо и целосно обновување на туризмот во Европа“.
Странскиот туризам во Грција ќе биде достапен за посетители од држави со добри епидемиолошки карактеристики, а балканските земји може да бидат меѓу првите за кои ќе биде дозволен влез без тест за коронавирус и без задолжителен карантин.
Ова го предвидува планот на грчката Влада „Restart tourism“ што вчера го претстави министерот за туризам на Грција, Харис Теохарис, кој рече дека станува збор за „програма што ги содржи сите неопходни предуслови за брзо и безбедно да започне грчкиот туризам“.
Според SKAI, на списокот земји кои ќе може да ги пратат првите туристи во Грција сезонава содржи 19 земји, меѓу кои и Северна Македонија.
На списокот се најдоа и Кипар, Израел, Кина, Јапонија, Австралија, Норвешка, Данска, Австрија, Бугарија, Србија, Романија, Албанија, Босна и Херцеговина, Хрватска, Полска, Унгарија, Словачка и Република Чешка.