Во последните неколку месеци Северна Кореја е секогаш помеѓу главните теми на разговор во светските медиуми, и останатите светски држави ги осудуваат постапките на тамошниот владетел, Ким Јонг Ун.
По сослушувањето на сведочењата на поранешни затвореници и чувари на затворите во Северна Кореја, судијата Буергентал рече дека условите во овие затвори се полоши дури и од оние во Аушвиц.
Томас Буергентал, кој служеше на Интернационалниот суд на правдата, е еден од тројцата членови на поротата кои одлучија дека севернокорејскиот лидер Ким Јонг Ун треба да биде осуден за криминал против човештвото поради начинот на кој ги користи неговите брутални политички затвори за да ја контролира популацијата.
„Верувам дека условите во затворите во Северна Кореја се подеднакво, ако не и полоши од оние во Нацистичките логори за време на Втората светска војна“, рече Буергентал, кој како дете поминал време во логорот во Аушвиц.
Тој беше дел од панел во кој учествуваа и Нави Пилај, јужноафрикански судија кој е поранешен комисионер за човекови права во ОН, и Марк Хармон, американски судија кој работеше на воените случаи во Југославија и Камбоџа.
Тројцата слушаа изјави на поранешни затвореници и затворски чувари за да ја утврдат состојбата на затворите во Северна Кореја, како и управувањето на државата од страна на Ким Јонг Ун.
„Не постои ваква ситуација на ниту едно друго место во светот“, изјави Нави Пилај.
Експертите сметаат дека има околу 130.000 Севернокорејци затворени во четири огромни кампови, каде тие се приморани да вршат тешка физичка работа, најчесто работат во рудници, а притоа добиваат многу мало количество на храна и вода.