Синдикатот на Фудбалери на Македонија во соработка со десетте прволигаши ќе организира масовно тестирање на сите фудбалери како и сите инволвирани лица во најквалитетната македонска фудбалска лига.
И македонската Прва лига треба кога-тогаш да продолжи, иако од ФФМ с уште немаат конкретен датум кога тоа би се направило. Министерството за здравство треба да даде дозвола кога клубовите би започнале со тренинзи, а за да истрчаат на зелениот терен треба и сите да направат тестирање за коронавирус.
Претседателот на СФМ, поранешниот репрезентативен дефанзивец Панче Ќумбев, потврди дека СФМ ќе го организира тоа тестирање преку соопштение кое го пренесуваме во целост:
„Синдикатот на Фудбалери на Македонија (СФМ) во координација со клубовите од Прва македонска фудбалска лига ќе организира тестирање на коронавирус на сите фудбалери, тренери и стручните штабови коишто доброволно ќе сакаат да се тестираат. Пред и за време од започнување со нормален тренажен процес мобилна екипа ќе доаѓа по клубовите и ќе врши тестирања со цел фудбалерите и сите што имаат контакт со нив во клубовите безгрижно да можат да си ги извршуваат своите работни задачи. Во преговори сме со една од приватните клиники и се надеваме ќе најдеме заеднички јазик и можност ова да го спроведеме во целост. Начелно добивме согласност од сите клубови. Во моментов како синдикат сме финансиски моќни да организираме едно тестирање (тестирање на преку 300 луѓе) и доколку е потребно најмалку три тестирања како во некои европски земји се надевам ФФМ и прволигашите ќе смогнат сили и обезбедат средства за другите две тестирања. Да напоменам дека немаме можност за тестирање на сите второлигаши и временски и финансиски, но доколку некој играч, тренер или било кој член од клубовите од Втора лига пројави интерес за тестирање слободно нека нѐ контактира и ќе му овозможиме тестирање.
Да напоменеме дека сите тестирања СФМ комплетно ги покрива, без никаков трошок за клубовите и играчите.
Се надевам дека преговорите со клиниката ќе бидат успешни и оваа акција ќе ја спроведеме во целост.
Претседател на СФМ,
Панче Ќумбев“.
