Граѓанската иницијатива Шанса за Центар вели дека за нив бетономешалки и кранови не се показател зa успех, откако градоначаникот Горан Герасимовски се пофалил дека општината има пари како никогаш претходно.
„На последниот брифинг, градоначалникот Герасимовски се пофалил дека општината има пари како никогаш досега, благодарение на 'доброто менаџирање'. Но, вистината е сосема поинаква и горчлива. На последната седница за ребаланс на буџетот дознавме дека 'успехот' не се должи на добри политики, туку на распродавање на јавниот интерес. Општината е полна со пари од издавање градежни дозволи, како резултат на спроведување на спорните детални урбанистички планови донесени пред 12 години, а кои го претворија секое слободно или зелено парче во просторот во градежна парцела“, велат од оваа граѓанска иницијатива.
„До ноември оваа година наплатени се дури 6,8 милиони евра од градежни дозволи или цели 2 милиона евра повеќе од планираното. Ова не е напредок, туку уништување! Со реализација на овие многупати оспорени планови се штитат само интересите на инвеститорите, а јавниот интерес е занемарен и тргнат настрана. Се уништува квалитетот на живот, се создава урбан хаос, а долгорочните последици ќе ги чувствуваме сите ние жителите. Бројот на бетономешалки и кранови не е показател за успех ниту за напредок! Ова е за аларм зошто вака Скопје никогаш нема да е град луѓето, а градоначалникот ќе биде запаметен како оној кој овозможи да победи профитот пред јавниот интерес“, завршува објавата на Шанса за Центар, која има тројца советници во Советот на Општина Центар.
