Сагата наречена Лионел Меси и Барселона продолжува и денеска и прашање е уште колку долго ќе трае.
Претседателот на каталонскиот клуб, Жузеп Марија Бартомеу, е подготвен да се повлече од функцијата, но само под еден услов.
Шпанските медиуми објавија дека Бартомеу е подготвен да даде оставка ако Меси јавно каже дека ќе остане во Барселона.
Аргентинецот веќе испрати бурофакс до клубот каде игра 20 сезони, известувајќи го дека сака да си замине користејќи клаузула во договорот.
Веста го потресе фудбалскиот свет и предизвика протести во Барселона, а многумина сметаат дека главната причина зошто Меси сака да си замине е токму Бартомеу, бидејќи капитенот не е задоволен од начинот на кој актуелниот претседател го води клубот.
Шпанските медиуми додаваат дека Меси одлучил да замине, без разлика на ставот на Бартомеу, а има шпекулации и дека Аргентинецот не сакал да одговори на телефонските повици на актуелниот претседател на Барселона.
Пред 20-ина дена, Бартомеу во интервју за beIN SPORTS изјави дека главната ѕвезда на Барса нема да си оди и дека ќе игра уште три или четири сезони по што ќе замине во пензија.
„Не го велам ова само јас. Самиот Меси го кажува, дека сака да ја заврши професионалната кариера во Барселона и дека тоа е единствениот клуб за него“, рече тогаш Бартомеу.
Секако, останува отворено и најголемото прашање: Каде следно ќе заигра Меси?
