Претседателот на Јувентус, Андреа Ањели, е најголемиот заговарач за фудбалска суперлига во која би играле најголемите европски клубови, а на самитот во Лондон зборуваше за натпреварување кое би било далеку посилно од сегашната Лига на шампиони.
„Почитувам сѐ што прави Аталанта, но без историја на европската сцена и само благодарение на една добра сезона имаа директен пат во елитното европско натпреварување. Дали е тоа правилно или не? Потоа помислувам на Рома која во изминатата година даде голем придонес за рејтингот на италијанскиот фудбал. Имаше само една лоша сезона и испадна од елитата, со сите последици кои се одразија на нејзините финансии“, рече Ањели.
Шефот на Јувентус би сакал да се редизајнира Лигата на шампиони и цели на моделот на НБА за да бидат заштитени великаните.
„Треба да ги заштитиме нашите инвестиции. Дали во тој случај Аталанта би имала помали шанси да заигра на врвно ниво? Не морам да одговорам на тоа прашање, мора да направиме транспарентен процес кој ќе нѐ доведе до вистински одлуки. Има екипи кои освојуваат лига или куп и автоматски се квалификуваат во европско натпреварување. Само на основа на националниот коефициент. Поентата е да направиме рамнотежа меѓу она со кое придонесува клубот за европскиот фудбал и неговите резултати во една сезона“, додаде Ањели.
За потсетување, Аталанта е на дофат на четвртфиналето на ЛШ откако ја победи Валенсија со 4:1 во Милано, додека Јувентус во првата средба од осминафиналето изгуби од Лион со 1:0.
