Павел Дуров, основачот на апликацијата Telegram, кој е под истрага во Франција, денеска објави дека француските власти наместо да го приведат, требало да ѝ се обратат на неговата компанија.
На својот канал Telegram, во својот прв јавен коментар по притворањето минатиот месец, Дуров негираше каква било сугестија дека апликацијата е „анархичен рај“.
Тој рече дека истрагата за апликацијата го изненадила бидејќи француските власти можеле во секое време да стапат во контакт со претставникот на Telegram во ЕУ.
„Доколку државата не е задоволна од интернет услугата, воспоставената практика е да се покрене судска постапка против самата услуга“, напиша тој.
„Користењето закони од ерата пред паметните телефони за да се обвини извршен директор за злосторства извршени од трети лица на платформа со која тој управува е погрешен пристап“, вели Дуров.
Тој рече дека Telegram не е совршена, но негираше каква било злоупотреба поврзана со апликацијата.
„Но, тврдењата во некои медиуми дека Telegram е некаков анархичен рај се апсолутно лажни. Секојдневно отстрануваме милиони штетни објави и канали“, напиша тој.
Дуров е роден во Русија, но подоцна доби француско државјанство. Тој беше приведен кон крајот на минатиот месец во Франција во услови на истрага за злосторства поврзани со детска порнографија, трговија со дрога и лажни трансакции поврзани со апликацијата.
