Српскиот тенисер Новак Ѓоковиќ изминативе денови ги мина во Ријад, Саудиска Арабија, на егзибицискиот турнир „Слем Шест кралеви“, а по тој повод направи и интересна „фотосесија“ која ги воодушеви Саудијците.
Ѓоковиќ позираше во нивната традиционална носија на неколку локации, по што на социјалните мрежи продолжија коментари како „Шеикот Новак“, „Крал на пустината“ и слично. Некои фанови не беа одушевени што Србинот на овој начин ја промовира Саудиска Арабија.
Ѓоковиќ се покажа како многу активен во кампањата за промоција на тенисот во Саудиска Арабија и на овој начин дополнително ја промовираше самата земја, а нема сомнеж дека беше богато награден како Лионел Меси и Кристијано Роналдо кои се туристички амбасадори на Саудиска Арабија.
Турнирот немаше натпреварувачко значење и не носи бодови за АТП листата, но на Саудијците не им беше тешко да ги привлечат „кралевите“ бидејќи победникот Јаник Синер однесе дома шест милиони долари, што е најголемата парична награда во историјата на тенисот.
Секој од тенисерите само со доаѓањето на овој турнир заработи по најмалку 1,5 милиони американски долари, а покрај Синер и Алкараз, на турнирот учествуваа и Даниил Медведев, Холгер Руне, Рафаел Надал и Новак Ѓоковиќ.
