Шерон Стоун ги пофали Роберт де Ниро и Џо Пеши за нивното однесување како актери, зборувајќи за мизогинијата во Холивуд.
Стоун, која работеше со двајцата актери на гангстерскиот филм „Casino“ од 1995 година, рече дека ниту еден од нив не се однесувал „мизогино“ на кој било начин кога работеле заедно. По тоа појаснување, ѕвездата на „Basic Instinct“ отворено „распали“ за женомразачкото однесување што не било реткост меѓу холивудските актери.
„Работев со некои од најголемите ѕвезди во бизнисот, кои буквално не престануваа да зборуваат додека јас снимав во крупен кадар, кажувајќи ми што да правам“, изјави таа за Variety. „Беа толку мизогини, но во нив не се вбројуваат Роберт де Ниро и Џо Пеши, тие не се такви“.
Стоун продолжи, објаснувајќи: „Тие [актерите во главна машка улога] едноставно не ме слушаа и не дозволуваа јас да влијаам на нивната изведба со мојата изведба. Тоа не е одлична глума. Мислам, сфаќам дека си одличен и сите мислат дека си прекрасен. Но, слушањето, присуството во тие расцепкани моменти е вистинското човечко искуство“.
Актерката го заокружи навраќањето на нејзиното искуство од работата со овие ѕвезди, велејќи: „Не сум баш популарна во Холивуд бидејќи луѓето не сакаат да ги слушаат, како што велат, моите зае*ани мислења. Можеби е тоа поради мојата посветеност, можеби затоа што сум само некако чудак. Но, јас го работам ова за да бидам присутна кога глумам“.
Со години кружат гласини за наводни тензии на снимањето меѓу Стоун и нејзиниот колега Мајкл Даглас, со кого ги играа главните улоги во „Basic Instinct“. Говорејќи набргу по објавувањето на филмот, Стоун рече дека намерно не го запознала Даглас премногу добро, така што секоја тензија помеѓу парот зад сцената ќе може да продолжи и во нивните изведби пред камера.
„Навистина чувствував дека можеме да имаме одредена чудна, динамична енергија заедно. Никогаш не ми беше удобно околу него и мислам дека и нему не му беше удобно покрај мене“, рече Стоун за Playboy Magazine.
