Индивидуалните домаќинства на шест улици во Охрид оваа година согласно Програмата за заштита на животната средина и природа ќе добијат садови за одлагање отпад.
Програмата преку која секоја година се доделуваат канти за отпад оваа година предвидува пластични садови од по 120 литри да добијат домаќинствата на улиците „Димо Хаџи Димов“, „Париска комуна“, „Партизански одреди“, „ АРМ на Македонија“, „Сирма Војвода“ (само непарни броеви) и „Момчило Јорданоски“ (само парни броеви).
Граѓаните садовите за отпад ќе можат да ги подигнат во просториите на Ј.П. „Охридски Комуналец“ на улицата „АСНОМ“, а за подигнување треба да приложат документ за лична идентификација на кој ќе биде видлива адресата на живеење и сметка за собирање, транспортирање и депонирање на комунален отпад. Кантите ќе може да се подигнат секој работен ден во текот на овој месец од 7 до 13 часот.
Граѓаните садовите за отпад треба да ги оставаат на лесно достапни места за возилото за собирање на отпад согласно предвидената динамика за собирање на отпадот од наведената улица.
– Целта на оваа активност е да се укаже на проблемите од областа на екологијата и да се влијае на подигање на јавната свест на граѓаните за заштита на животната средина. Во голема мера отпадот се собира во нестандарна амбалажа, а со собирање во соодветни пластични садови се подобруваат хигиенско-санитарните услови, заради тоа што нема непријатни миризби и нема разнесување на отпадот и формирање на диви депонии, посочуваат од локалната самоуправа.