Поранешниот голгетер на „росонерите“ има желба да се седне на проколнатата клупа на Милан, но тек откако ќе ја однесе Украина на ЕУРО 2020.
Се чини деновите на Марко Џампаоло на црвено-црната клупа се избројани, особено по третиот едноподруго пораз во Серија А, овој пат од Фиорентина.
Андртиј Шевченко како поранешен голгетер на клубот има и тоа какво реноме, а добро му тргна и во тренерскиот занает бидејќи со Украина е пред пласман на Европското првенство наредната година. Токму тоа е и причината зошто популарниот Шева во моментов не сака да го преземе Милан.
„Му посакувам сѐ најдобро на Милан, но управата засега ме нема контактирано, а јас како професионалец во моментов не ни мислам на Милан. Селектор сум на Украина и сум тотално посветен на мојата земја. Сакам да одам на ЕУРО со моите момци“, изјави Шевченко за La Gazzetta dello Sport.
„Малдини и Бобан се вистинскиот избор за Милан. Вистина е дека сум тука, во Милано, но за да ги гледам моите играчи, првенствено Малиновскиј кој игра добро за Аталанта, а по натпреварот бев на вечера со моите пријатели од Милан. Но, само поради тоа што ни е убаво заедно, ние се гледаме секој пат кога имаме шанса“, Шева ја оправда посетата на Милано. Аталанта како домаќин во Лигата на шампионите настапува во Милано, а синоќа Руслан Малиновски влезе во игра во вториот дел.
Шева имаше и други играчи за гледање бидејќи противник на „Деа“ беше украински Шахтар кој на крајот и славеше со 2:1 со гол во судиското надополнување.
На Украина ѝ оди одлично во квалификации, има 4 победи, 1 реми и е без пораз, а претстојните натпревари месецов и во ноември ќе бидат клучни за четата на Шева, но голема е веројатноста дека ќе ги гледаме на ЕУРО идната година.