Редицата реплики и контра реплики помеѓу пратениците од ВМРО-ДПМНЕ на темата „тиранска платформа“, ја прекина пратеникот на СДСМ Петре Шилегов.
Тој им порача на колегите од ВМРО-ДПМНЕ да ја ослободат собраниската говорница, да се помират дека се во опозиција и да дозволат на сцена да стапи како што рече Новата Влада која ќе се стреми кон правна држава.
„Четврта недела претседавате со седница каде слушнавме се и сешто. Дозволивте на оваа седница да се пласираат класични и ноторни лаги. Од ДПМНЕ, ВМРО не бидува. Митовите на македонската револуција ги злоупотребувате и лажете. Вие сте најголемите предавници во Македонија, најголемите борци против македонштината.
Поддржувате човек кој го урниса уставниот поредок на Македонија. Да ја сакавте Македонија, немаше да ја крадете. Да бевте патриоти, ќе имавте чувство за нејзиното минато, сегашноста. Вие имате за цел да се спасите од криминалното владеење од изминатите години. Не е страшно да си отидете по 11 години и да заминете во опозиција и да видите како владее правото и правната држава. Ако продолжите вака ќе останете без пет пратеници. Вие сте срам за Македонија!“
По процедуралната забелешка реагираше претседавачот Трајко Вељановски.
„Шилегов не издржа без процедурално. Едноставно не издржа. Таман се поправи работата, се си течеше во најдобар ред, вие се јавивте и го прекинавте“, рече Вељановски.
