Градоначалникот на Скопје, Петре Шилегов, вели дека Општината нема да го плати долгот на Вардар иако клубот се враќа во нејзина сопственост.
Според Шилегов, претходниот сопственик Сергеј Самсоненко треба или да ги подмири долговите или некој да му помогне финансиски. Иако не кажа категорично дека Град Скопје нема да ги подмири тие долгови, меѓу редови токму тоа го изјави, дека Градот нема зошто да фрла пари во Вардар.
„Значи, во овој момент она што јас го имам како сознание, фудбалскиот клуб Вардар е должен, односно сопственикот на фудбаскиот клуб Вардар е должен, или има обврски, некаде над два милиона евра. Два милиона евра. Што неисплатени плати, што неисплатени аконтации, сега да не навлегувам јас во таа анализа. Секој добар совет, кој што ќе значи влез на два милиона евра во касата на фудбалскиот клуб Вардар, јас ќе го прифатам. Ако вие имате начин да ми кажете како да му се помогне на Сергеј Самсоненко и да му бидат дадени два милиона евра за да го спасиме Вардар, јас сум прв што ќе ви ја пружам раката. Еве ви го челинџот. Да помогнеме на Вардар, се сложувам. Најдете два милиона евра да му помогнеме на Вардар“, рече Шилегов при синоќешното гостување во емисијата „Click Plus“ на TV21.