Скопски Шкупи од Чаир првпат по 6 години редовно играње во европските купови ова лето нема да игра меѓународен фудбал, а за тоа вината ја гледаат во претседателот на ФФМ, Муамед Сејдини.
Шкупи синоќа во последното коло од 1.МФЛ успеа да слави на гости кај старо-новиот шампион Струга со 2:1, но победата беше пирова оти Шкендија со 2:0 славеше во Скопје кај Работнички и остана на 2. место, последно кое преку лигата води во фудбалска Европа. Другото место е за победникот во Купот, кој ќе се дознае в среда, а ќе се борат Тиквеш и Воска Спорт.
Од оваа сезона Македонија има само 3 места во Европа, од кое 1 во квалификациите за Лигата на шампионите и 2 во квалификациите за Конференциската лига. До лани беа 4 места, односно едно плус во Конференција, но лошите резултати на нашите претставници ѝ наложија на УЕФА да ни одземе едно место.
Шкупи како третопласиран извиси, па вината ја бараат во Фудбалската федерација на Македонија, или поточно во претседателот Муамед Сејдини кого и јавно го нападнаа во официјална клупска објава на Facebook.
„Чекавме да завршат натпреварите за да зборуваме за многу работи. Прво им честитаме на играчите и стручниот штаб на Струга затоа што никој не може да ги игнорира нивните напори, меѓутоа не ѝ честитаме на Струга како клуб и никогаш нема да го направиме тоа“, почнува соопштението на Шкупи.
„За жал, во оваа земја трофеите не се освојуваат, туку се купуваат. Наскоро ќе ѝ го покажеме ова на цела Македонија. Претседателот на ФФМ нема што да му даде на фудбалот, само му прави штета. Ако темата е фудбалот во државата, тогаш мора да се ослободиме од актуелниот претседател на ФФМ. Се крие зад политика, го користи името преку политика, а некогаш ја штити политиката за нејзини интереси, а не фудбалот. Тој е рак на фудбалот“.
„Следната недела ќе споделиме детали со јавноста. Никој нема да избега од одговорност ако се крие зад политика и ако игра нечисти игри. Ќе донесеме сериозни одлуки за иднината на Шкупи и ќе ги споделиме причините со јавноста“, завршува клубот од Чаир.
