Свет

Шофер со тужба против Трамп: Ми должи пари за 3.300 часа прекувремена работа

12. јули 2018 - 10:45 | М.Д.

Човек од Њујорк, кој повеќе од две децении работеше како личен шофер на Доналд Трамп, тврди дека актуелниот американски претседател, односно една од неговите компании, му должи огромна сума на пари за неплатени 3.300 часа прекувремена работа.

Во обвинението, кое го поднесе до Високиот суд во државата Њујорк, Ноел Синтрон, тврди дека Организацијата Трамп („Trump Organization“ - заеднички назив за повеќе од 500 компании и бизнис организации во сопственост на Трамп), не му исплатиле вкупно 3.300 часови прекувремена работа за последните шест години.

Тоа е, инаку, максималниот период во кој, поради правилата на компаниите, тој може да поднесе тужба. Синтрон во тужбата пренесува дека не добил ниту зголемување на платата, цели 12 години.

Тој сега, освен неисплатените пари, од Трамп бара и останати бонуси, кои му припаѓаат според сојузните и државните закони, како и одреден износ за претрпената штета.

Ноел Синтрон тврди дека повеќе од четвртина век работел за Трамп и тоа помеѓу 50 и 55 часа неделно. Тој остана дел од најблискиот персонал на Трамп, дури и кога безбедносните служби ја преземаа грижата за него како шеф на Белата куќа.

Неговата плата во 2010 година е зголемена од 68.000 на 75.000 долари, но подоцна му се укинати примањата за здравствено осигурување. Синтрон вели, дека врз основа на тоа, Трамп годишно штедел 17.866 долари.

Основната сума, која наводно не му е исплатена и сега Синтрон ја бара, изнесува 178.000 долари, бидејќи тој работел за 54 долари од час.

„Tramp Organization“ се уште не се огласи по повод овој случај.

Инаку, ова обвинение е само едно во низата, на оние кои веќе од порано се поднесени до Високиот суд во државата Њујорк, а кои се однесуваат токму против Трамп и неговите компании.

Коментирај