Топлотниот бран во Европа предизвикува проблеми на работното место за многу луѓе, особено за вработените во јавниот превоз во градот Нант, Франција.
Шоферите на автобуси во Нант се појавија на работа облечени во здолништа откако управата им забранила да носат шорцеви или кратки панталони кога се на работното место, иако температурите се неподносливи.
Тие велат дека забраната е апсурдна и укажале дека на жените возачи им е дозволено да работат во здолништа, а мажите не смеат да носат шорцеви.
„Униформите не ни се соодветни за овие високи температури. Во вакви моменти им завидуваме на жените“, вели Дидие Советр, возач на CFDT.
Протестот има логика: откако шоферот ќе седне зад воланот патниците не можат да им ги гледаат нозете, па теоретски, не е важно дали носат панталони со кратки или долги ногавици.
Габриел Мање, член на синдикатот на возачи, вели дека високите температури во комбинација со затворената кабина и слабата вентилација придонесуваат возењето во панталони со долги ногавици да биде „неподносливо“.
Тој додава дека фактот дека жените може да носат кратки здолништа, а мажите не смеат да носат шорцеви на работа е дискриминација на работното место.
Французите не се први во ваквиот начин на протестирање против жештината. Џои Барџ од Велика Британија, кој работи во кол-центар, направи нешто слично.
Шефот му рекол да се врати дома и да се преслече откако дошол на работа во шорцеви на жежок ден. Во знак на протест, Џои следниот ден дошол на работа облечен во фустан. По ваквата протестна нота, управата го сменила дрескодот за вработените и дозволила мажите да носат панталони со ¾ ногавици, само во црна, тегет и крем боја.
Пет ученици во Девон изведоа сличен протест и се појавија на училиште облечени во здолништа откако им рекле дека ќе бидат суспендирани бидејќи носеле шорцеви на час. Наставничката му рекла на едно од 14-годишните момчиња дека може да носи здолниште ако му е многу жешко и момчето буквално ја послушало.