Атланта Јунајтед го направи најголемото изненадување во историјата на плејофот на МЛС Купот, објави официјалниот сајт на натпреварувањето, откако синоќа во третиот натпревар го совлада Интер Мајами со 3:2 и ги елиминираше Лионел Меси, Луис Суарес, Серхио Бускетс, Жорди Алба и нивните соиграчи од плеј-оф.
Интер Мајами влезе во плејофот како најдобар тим во МЛС и освои дури 34 бода повеќе од Атланта (74:40) во сезоната од 34 натпревари. Против деветтиот тим на Истокот имаше предност од 1:0 во серијата која се играше на две победи, но тоа не му беше доволно, а Атланта во полуфиналето на конференцијата ќе ги одмери силите со Орландо Сити.
Матиас Рохас во 17. минута го доведе Интер Мајами во водство, а потоа гостинскиот тим за само две минути направи пресврт и Џамал Тиаре погоди во 19. и 21. Меси постигна гол со глава во 65. минута и го израмни резултатот на 2:2.
Малку подоцна ќе се покаже дека неговиот 23-ти гол сезонава (има и 13 асистенции) на 25-от натпревар беше и последен негов годинава, бидејќи Бартош Слис ја заврши сезоната за Интер Мајами во 76-та минута.
„Шок над сите шокови, сензација на сите сензации“, опиша во својот извештај порталот Goal.
