Римскиот клуб потврди дека Жозе Мурињо се враќа на Чизмата и ќе ја води Рома наредната сезона.
Рома денеска објави дека соработката со тренерот Паулу Фонсека ќе заврши со завршувањето на тековната сезона, а потоа објави и вистинска бомба: нов тренер на Рома ќе биде никој друг туку Специјалниот.
„Возбудени и воодушевени сме што можеме да му посакаме добредојде на Жозе Мурињо во Рома. Голем шампион кој освоил трофеи на секое ниво ќе донесе неверојатно лидерство и искуство во нашиот амбициозен проект“, соопштија претседателот Ден Фридкин и подпретседателот Рајан Фридкин.
Мурињо скоро доби отказ од Тотенхем, а во Италија ќе се врати прв пат откако го напушти Интер летото 2010 година. Пред некој ден самиот Мурињо како да најави можно враќање во Италија изјавувајќи дека би можел еден ден да води клуб од Италија, а тој клуб да не е неговиот Интер.
Специјалниот потпишал 3-годишен договор со „Римската волчица“.
