Грешката со регистрацијата на фудбалерот од Гвинеја ја чини Рома пораз на зелена маса уште на стартот од новата сезона во Серија А.
Спортскиот суд при Серија А донесе пресуда Верона да го добие со службени 0:3 натпреварот игран во саботата во Рим против Рома кој заврши 0:0.
Пресудата е резултат на тоа што Рома настапи со играч со погрешна регистрација. Имено, Гвинеецот Амаду Дијауара не бил запишан во листата од 25 пријавени првотимци, туку во онаа додатната за играчи до 22 години. Арно ама, Дијауара во јули наполни 23 години и повеќе не се смета за млад фудбалер, што значи може само да биде регистриран во првиот тим. Минатата сезона настапуваше како млад играч.
Рома веќе ја исправи грешката и го вметна во првиот тим, но касно.
Римјаните најавија дека ќе се жалат на одлуката иако правно немаат основа за тоа бидејќи грешката е навистина направена. Сепак, „Волчицата“ се надева на добра воља од страна на Лега Калчо бидејќи пропустот не влијаеше на натпреварот и со ништо не ѝ даде предност на Рома со оглед на тоа што имаа слободни места за уште играчи во првиот тим (не им беа пополнети сите 25 места).
