Шок за ѕвездата на Барса! Холанѓаните ја добија најлошата вест на само 4 дена пред ЕУРО

Фудбалската репрезентација на Холандија синоќа го доживеа најтешкиот можен удар, бидејќи најголемата ѕвезда на селекцијата, Френки де Јонг го откажа настапот на Европското првенство.

На само четири дена пред почетокот на собирот на најдобрите селекции во Европа, Холанѓаните останаа без клучен фудбалер. Членот на Барселона, Френки де Јонг, го откажа настапот поради повреда на десниот зглоб.

Де Јонг се повреди на 21 април, но се чинеше дека ќе биде подготвен за настап на ЕУРО 2024. Селекторот Роналд Куман го вброи во списокот од 26 фудбалери и имаше јасни планови со него како предводник на тимот, но од тоа нема ништо, потврди синоќа на социјалните мрежи самиот играч од средниот ред.

Де Јонг изјави дека „ја загубил трката со времето“ и дека нема да биде доволно фит за настап.

„Тажен сум и разочаран што нема да стигнам на ЕУРО. Работевме многу во изминатите неколку месеци, но на мојот глужд му треба повеќе време, за жал“, рече Де Јонг во емотивната објава и додаде:

„Сон и најголема чест е да ја претставувам земјата на еден голем турнир, но сега, како и целата нација, ќе навивам за нашиата репрезентација од страна“, додаде играчот од средниот ред на Барселона.

Селекторот на Холандија директно ја обвини Барселона за неговите повреди. Тој рече дека го ризикувале неговото здравје во Барселона, а сега Холандија ги трпи последиците.

На местото на Де Јонг селекторот Куман го повика 22-годишниот лев бек на Борусија Дортмунд, Иан Маатсен, кој досега има настапи само за младинските репрезентации на Холандија.

Ова е трето откажување за Куман пред ЕУРО откако претходно поради повреди отпаднаа и Мартен де Роон од Аталанта и Куинтен Тимбер од Фејнорд.