Данската кралица Маргрета, која по смртта на Елизабета Втора е единствената владејачка кралица во Европа, ги одзеде титулите на 4 од нејзините 8 внуци, соопштија од палатата.
Како официјална причина е желбата на кралицата на децата од нејзиниот најмлад син, принцот Јоаким, да им овозможи што понормален живот. Чекорот следи по слични потези на други кралски семејства во Европа, велат од палатата.
„Од 1 јануари 2023 година потомците на неговото кралско височество принцот Јоаким ќе можат да ги користат само титулите гроф и грофица од Монпезат, а нивните претходни титули принц и принцеза на Данска престануваат да постојат“, соопштија од кралската палата.
Педесет и тригодишниот принц Јоаким има 4 деца од два брака, на возраст од 10 до 23 години.
„Со својата одлука нејзиното величество кралицата сака да создаде простор за четирите внуци за да можат да ја обликуваат сопствената егзистенција во многу поголема мера без ограничувања и обврски формирани од припадноста на кралската куќа“, стои во соопштението.
Ова дојде како шок за мајката на двајцата најстари синови на принц Јоаким, која пред данските медиуми не го криеше нејзиното незадоволство.
„Ова дојде како гром од ведро небо. Децата се чувствуваат исклучено“, изјави грофицата Александра. „Не можам да разберам зошто им се одзема идентитетот“.
Четири внуци на кралицата, родени од престолонаследникот Фредерик, ќе ги задржат титулите, но кога ќе станат полнолетни апанажа ќе добива само идниот крал, принцот Кристијан.
Оваа одлука е донесена во 2016 година.