Денеска е првиот од десетте дена жалост што ги прогласи Шпанија за да им оддаде почит на граѓаните кои починаа од COVID-19 во земјата.
Целата земја е во Прва или Втора фаза (зависно од регионот) од планот за деескалација на рестриктивните мерки што беа воведени на 14 март за заштита и спречување на ширењето на коронавирусот.
Министерството за здравство вчера го намали вкупниот број на починати како последица од COVID-19 за речиси 2.000 на 26.834, откако беа утврдени дуплирања и непотврдени случаи во различни региони, соопшти Фернандо Симон, директор на Координативниот центар за итни здравствени состојби.
Шпанскиот премиер Педро Санчез во саботата го најави десетдневниот период на жалост, нагласувајќи дека „шпанското општество ја спречи најголемата здравствена катастрофа во изминатиов век“.
Додека трае најдолгиот период на жалост во историјата на шпанската демократија, знамињата на јавните установи и морнаричките бродови ќе бидат спуштени на пола копје.