ФИФА ја предупреди фудбалската федерација на Шпанија дека местото на шпанската репрезентација на Светското првенство во Русија би можело да биде загрозено поради политичките пречки кои ги поставува нивната влада.
Според ФИФА, мешањето на централно-десничарската влада на Шпанија во изборот на нов претседател на шпанската фудбалска федерација би можело да резултира во дисквалификување на шпанската репрезентација од претстојното Светско првенство.
Шпанската фудбалска федерација (RFEF) во моментот ја води Хуан Луис Лареа како в.д. претседател, откако поранешниот претседател Анхел Марија Вилар го отстапи местото поради обвинувањата за корупција.
Подготовките за избор на нов претседател се во тек, а според шпанскиот весник El Pais, владината агенција Национален спортски совет веќе ја контактирал федерацијата со однапред одбран наследник на Вилар.
Тоа би било против законите и правилата на ФИФА, кои велат дека ниту една национална влада не смее да се меша во изборот на функционери во фудбалските федерации.
ФИФА може да го суспендира секој национален тим од првенствата и натпреварите кои се организирани под нивната капа, па така учеството на репрезентацијата на Шпанија би можело да биде загрозено доколку Светската фудбалска федерација ја докаже вината на шпанската влада.