Кошаркарите на Шпанија синоќа ја победија Франција со 88:76 во финалето на ЕвроБаскетот кое се одигра во Берлин, со што дојдоа до својата четврта титула шампиони на Стариот континент.
Шпанците подобро го отворија натпреварот и веднаш на почетокот дојдоа до водство, а веќе после 5 и пол минути имаа предност од 9 поени (14:5).
Со истиот ритам продолжија да ја играат првата четвртина и набрзо дојдоа до двоцифрена предност, а по првите 10 минути игра резултатот гласеше 23:14. Тука не застанаа, напротив, заиграа уште подобро и на почетокот од втрората четвртина дојдоа до голема предност од +19 (35:16).
Шпанците играа, сјајно, имаа и голема поддршка од трибините, но потоа Франција се разбуди, конечно покажа квалитет и со серија од 11:0 пред полувремето се врати во игра намалувајќи на -10(47:37).
По 4 минути во третата четвртина Французите дефинитивно се вратија во игра за пехарот кога со серија 9:2 дојдоа на само -3 поени разлика (49:46). Шпанскиот селектор веднаш викна тајм-аут, ги смири играчите, а тие му вратија со серија од 9:0 (58:46). Гледачите уживаа во навистина сјајна и брза кошарка, а на крајот од третата четвртина Шпанците имаа предност од 66:57.
Во последната четвртина Шпанија го имаше резултатот под контрола и во ниту еден момент не дозволи Франција да се доближи. На крајот дојде до заслужена победа и чеврта титула европски шампион.
Севкупно, за Шпанија ова е 14-ти медал на Стариот континент, четврто злато, а имаат и 6 сребра и 4 бронзи. Од друга страна, за Франција ова е трето сребро, а имаат и 1 злато од 2013 и 6 бронзи.
Шпанија на ЕвроБаскетот претрпе само еден пораз, оној изненадувачкиот од Белгија во фазата по групи, а ги победија Бугарија, Груизија, Црна Гора, Турција, Литванија, Финска и во полуфиналето домаќинот Германија.
На крајот најефикасен кај новиот шампион беше Хуанчо Ернангомес со 27 поени, неговиот брат Вили, како и Лоренцо Браун уфрлија по 14 (Браун и 11 асистенции, единствен со дабл-дабл учинок), додека Хаиме Фернандес 13. Кај поразената екипа се истакна Еван Фурние со 23 поени, а Тома Ортел постигна 16.
Во натпреварот за 3. место претходно Германија ја победи Полска со 82:69.