Шпанската влада се согласи да воведе „вонредни мерки“ за заштеда на енергија поради енергетската криза што ја зафати Европа по руската инвазија на Украина, пренесува агенцијата dpa.
Сите згради во јавниот сектор, трговските центри, кината, канцелариите, хотелите, станиците и аеродромите нема да смеат да ја спуштат температурата под 27 Целзиусови степени во лето, додека во зима температурата нема да биде повисока од 19 Целзиусови степени.
Оваа одлука беше усвоена на состанокот на владата во Мадрид, а доцна во понеделникот ја соопшти Тереза Рибера, министерка за еколошка транзиција. Рибера рече дека планираните мерки мора да се воведат по еднонеделен преоден рок по објавувањето во службен весник.
Споменатата мерка ќе важи до 1 ноември 2023. Рибера рече дека тоа е почетен пакет кој е неопходен во „критична ситуација“.
„На Европа ѝ е потребна помош од Шпанија. Време е за солидарност“, рече министерката.
Правила за продавници и компании
Мерките, исто така, вклучуваат правила за продавниците и бизнисите да ги држат своите врати затворени со помош на автоматски систем што мора да се инсталира до 30 септември. Целта на ова, тврдат од Владата, е да се спречи топлиот или студениот воздух да излегува од загреан или ладен простор.
По 22 часот мора да се исклучи осветлувањето во неискористените канцеларии, излозите и спомениците, а во одредени згради ќе се започне со проверка на енергетската ефикасност. Рибера апелираше до приватниот сектор да го зголеми уделот на работа од дома.
Шпанија ги презема овие и дополнителни мерки, кои треба да се одлучат по летната пауза, за да ги исполни обврските преземени во европскиот план за вонредни состојби договорен минатата недела. Земјата ќе се обиде да ја намали потрошувачката на гас за 7 проценти. Шпанија првично беше против планот на Европската комисија, но на крајот, откако доби отстапки, го одобри.