Карло Анчелоти останува на клупата на Реал Мадрид, но шпанските медиуми се убедени дека на лето ќе биде заменет од Чаби Алонсо, актуелниот тренер на Баер Леверкузен.
Анчелоти сака да ја заврши својата магија во Мадрид со барем уште една титула во Лигата на шампионите или Ла Лига, по што би се збогувал од клупата на „Кралскиот клуб“.
Претседателот на Реал Мадрид, Флорентино Перес, е свесен за намерите на Анчелоти и наводно веќе постигнал прелиминарен договор со Чаби Алонсо. Алонсо ќе има задача да продолжи таму каде што застана Анчелоти. Новинарите од порталот Superdeporte тврдат дека Алонсо е во редовен контакт со Перес и дека веќе се сретнале неколку пати.
Баскиецот поставил голем број услови за преземање на клупата, а клучното барање е целосна контрола врз трансферите. Тој веќе јасно ставил до знаење кои играчи не ги сака во тимот и кои би сакал да ги доведе. За почеток, Алонсо побарал продажба на двајца играчи кои не се вклопуваат во неговите планови – Орелјан Чуамени и Ферланд Менди.
Тој верува дека нивното ниво не е доволно за неговата визија за тимот. Интересно, двајцата се моментално клучни играчи, Чуамени како последен играч од средниот ред и Менди како прв избор на лев бек. Од друга страна, Алонсо сака да го засили тимот со доведување на Флоријан Вирц од Баер, со кого веќе соработува и со кој ја освои титулата. Тој исто така планира да го доведе Алехандро Грималдо како замена за Менди на левиот бек. Грималдо, кој дојде преку младинските тимови на Барселона, стана ѕвезда благодарение на работата со Алонсо.
Уште еден потпис што го посакува Алонсо е Трент Александер-Арнолд од Ливерпул, чиј договор истекува наскоро и би можел да дојде без обештетување. Перес и раководството на Реал Мадрид веќе извесно време работеа на овој трансфер. Како потенцијално засилување се споменува и Никола Барела од Интер. Тој би можело да биде идеалната замена за Тони Крос, кој се пензионираше минатото лето.
Доколку Алонсо го преземе Реал Мадрид, јасно е дека ќе има значителни промени во тимот. Овие промени би можеле да се случат дури и ако Шпанецот не седне на клупата. Останува прашањето дали Лука Модриќ ќе го продолжи договорот или неговото заминување дополнително ќе го ослаби средниот ред на „Кралскиот клуб“.
