Фудбалската федерација на Македонија го претстави проектот според кој треба да се изгради западната трибина на „Градски“ во Штип.
Благодарение на Hat-trick програмата на УЕФА за развој на фудбалската инфраструктура во земјите во развој, Штип треба да добие нов лик на својот стадион.
Новата западна трибина ќе има капацитет од 2 илјади седишта со ВИП ложа, ресторан, простор за медиуми и за лица со инвалидитет, додека во подтрибинскиот простор ќе има соблекувални и простории за службени лица. Сето тоа по стандардите на УЕФА и ФИФА.
„Новиот стадион не само што ќе стане пристоен дом за штипската гордост, ФК Брегалница, туку би бил и прилика за македонската репрезентација да биде домаќин на важни квалификациски натпревари“, велат од ФФМ.
Досега македонската сениорска фудбалска репрезентација никогаш не играла натпревар, ниту пријателски, во градот под Исарот.
Стадионот веќе има рефлектори, а Брегалница е единствениот клуб во Македонија кој игра натпревари во ноќни термини. За потсетување, се работи за клуб кој се натпреварува во втората лига Исток, значи не е ни прволигаш. Работнички и Вардар играат на арената „Тоше Проески“, имаат услови за играње под рефлектори, но играат во скопскиот попладневен пекол.
Откако ќе заврши изградбата, ќе остане само уште да му се даде нормално име на стадионот, во чест на некој поранешен фудбалер од Штип, или пак фудбалски работник. На пример Градски стадион „Драгослав Шекуларац“, или пак некој друг по избор на штипјани.
Фото: ФФМ
