Општина Штип и ФФМ заедно со помош од УЕФА ќе го реконструираат стадионот во Штип по што на него би можеле да се играат и меѓународни натпревари.
Претседателот на Фудбалската федерација на Македонија, Муамед Сејдини, заедно со потпретседателот Лазар Ракиџиев и членот на УО од ОФС Штип, Димитар Џонов, одржаа работен состанок со градоначалникот на Штип, Благој Бочварски на кој се сложија околу битни прашања и заклучија дека Градот и Федерацијата ќе ја продлабочат својата соработка во заеднички интерес, а тоа првенствено значи развој на фудбалската инфраструктура во Штип и целосна реконструкција на стадионот на кој настапува фудбалскиот клуб Брегалница.
„Мене ми е драго што со градоначалникот Бочварски, не само како архитект по професија, туку и како страствен навивач на Брегалница, фудбалот ни е заеднички јазик и уверен сум дека можеме да направиме големи работи за стадионот во Штип, како еден од нашите најголеми фудбалски центри“, рече Сејдини.
„Исклучително сум задоволен затоа што добив позитивен одговор од страна на претседателот на ФФМ и подготвеност тие да ја финансираат изградбата на едната трибина. Фудбалската федерација на Македонија во соработка со УЕФА ќе ја гради западната трибина на стадионот и заедно со општината ќе биде дел од проектот за изградба на репрезентативен стадион со категоризација за натпревари и од највисок ранг“, вели градоначалникот Бочварски.
Моментално во државава само стадионот „Тоше Проески“ во Скопје ги исполнува условите на УЕФА за одигрување меѓународни натпревари од сите категории, додека стадионот „Младост“ во Струмица едвај доби преодна оценка за одржување на натпревари од најниската категорија.
Во тек градежни работи на стадионите „Чаир“ во Скопје, „Атина Бојаџи во Охрид, „Гоце Делчев“ во Прилеп и „Под Тумбе Кафе“ во Битола кои исто така треба да добијат нов лик.