Престанувањето со апчиња за контрацепција е лесно, но предизвикува голем број несакани ефекти кои не се пријатни. Повеќето од овие несакани ефекти се краткотрајни и исчезнуваат сами од себе, но некои може да траат неколку месеци или дури една година.
Апчињата за контрацепција, освен што се користат за спречување на несакана бременост, често се земаат и за стабилизирање на менструалниот циклус и отстранување на менструалните болки, а генерално ги стабилизираат хормоните кои предизвикуваат појава на акни, влакна на несакани места и слично.
Откако ќе почнат да земаат апчиња за контрацепција, жените главно ги земаат со години, па после толку долг период на користење на контрацептивни таблети, неопходно е да се направи пауза.
Исто така, некои жени одлучуваат да престанат да ја користат таблетата затоа што сакаат да забременат.
Престанувањето со земање апчиња за контрацепција е многу едноставно, односно само треба да престанете да ги земате таблетите. Но, иако прекинувањето е лесно, на телото ќе му треба малку време да ги ребалансира хормоните, па одредени несакани ефекти се загарантирани.
Затоа, пред да престанете да земате апчиња за контрацепција, важно е да се консултирате со лекар или гинеколог за целиот процес на прилагодување да биде под контрола.
Откако ќе престанете да земате апчиња за контрацепција, односно со земање на хормони како прогестерон и естроген преку таблети, телото ќе мора да се навикне самостојно да ги произведува овие хормони и да „научи“ да ги балансира.
Ова ќе доведе до појава на бројни симптоми како што се:
- неправилен менструален циклус
– болни менструации со обилно крварење
– поинтензивни симптоми на ПМС и раздразливост
- нагло зголемување или губење на тежината
– главоболки
- појава на мозолчиња
– губење на косата
– промени во либидото
Времетраењето на овие симптоми варира од личност до личност, така што некои може да траат неколку недели, додека други, како што се неурамнотежен менструален циклус и болни менструации, може да траат неколку месеци.
Исто така, важно е да се нагласи дека е можно да забремените веднаш по прекинот на земање апчиња за контрацепција, без оглед на хормоналната нерамнотежа.
Своето искуство со нас го сподели и Валентина. Апчињата ги користела неколку години, а на крајот престанала да ги зема бидејќи веќе забележала одредени промени во телото додека ги земала.
„Престанав да ги пијам апчињата бидејќи ми правеа одредени проблеми со варењето дури и додека ги земав. Меѓутоа, кога престанав да ги земам, забележав намалено либидо, повремена летаргија и менструацијата повторно стана многу тешка и болна, како и пред да ги земам апчињата. Освен тоа, добив и целулит, од кој многу тешко се ослободувам“, ни откри соговорничката.
Не постојат специфични лекови или начини за спречување на овие симптоми.
Многу симптоми ќе исчезнат сами од себе, но со оглед на тоа дека некои од нив, како менструалните болки, се прилично непријатни, се препорачува да се земаат лекови против болки без рецепт, како што се Бруфен, Кетонал и слично.
„Несаканите ефекти траеја неколку месеци, а верувам дека зависи и од временскиот период на земање на таблетите. Ми требаше малку време циклусот да се стабилизира и да биде на исто ниво како кога ги земав апчињата, но потоа си дојде на свое. Би рекла дека најважно е да се биде трпелив, а доколку е потребно во случај на поголеми проблеми да се консултирате со гинеколог“, изјави Валентина.
