Разговорите на високо ниво меѓу руските и американските делегации завршија, а состанокот траеше околу 4,5 часа.
„Соединетите Американски Држави сакаат да го запрат убивањето и ја користат својата моќ во светот за да ги обединат земјите“, изјави портпаролката на Стејт департментот на САД, Теми Брус, во резимето на разговорите.
Таа додаде дека претседателот Доналд Трамп е единствениот лидер во светот кој би можел да ги натера Украина и Русија да се согласат околу тоа.
За време на разговорите, како што рече, американските и руските претставници се договорија:
- Да усвојат механизам за консултации за да се решат иритантите во билатералните односи со цел преземање на потребните чекори за нормализација на работата на дипломатските мисии.
- Да именуваат соодветни високи тимови кои ќе почнат да работат на патот кон завршување на конфликтот во Украина што е можно поскоро на начин кој е траен, одржлив и прифатлив за сите страни.
- Да ги постават темелите за идна соработка по прашања од заеднички геополитички интерес и историски економски и инвестициски можности кои ќе произлезат од успешното завршување на конфликтот во Украина.
- Да останат вклучени за да осигураат дека процесот напредува навремено и продуктивно.
Не е јасно на кого мислат под „иританти“, но некои веќе посомневаа дека се работи за европски и украински претставници.
Коментирајќи го телефонскиот повик на Трамп со рускиот претседател Владимир Путин минатата недела, Брус изјави:
„Еден телефонски повик проследен со еден состанок не е доволен за да се воспостави траен мир. Мораме да преземеме акција, и денес направивме важен чекор напред“, рече Брус.
Во соопштението се тврди дека „Трамп сака да го запре убивањето; Соединетите Американски Држави сакаат мир и ја користат својата моќ во светот за да ги обединат земјите. Претседателот Трамп е единствениот лидер во светот кој може да ги натера Украина и Русија да се согласат околу тоа“.
„Страните кои учествуваа на денешните состаноци се обврзаа дека ќе останат ангажирани за да осигураат дека процесот напредува навремено и продуктивно“, се наведува во соопштението.
Американците исто така ѝ се заблагодарија на Саудиска Арабија што беше домаќин на овие разговори.
