Хинт: Не е вецето и не е далечинскиот управувач.
Има неколку работи што знаете дека ќе ги добиете во хотелска соба, како чиста постелнина, а некогаш имате на располагање и ситници за хигиена како мини сапунчиња, шампони, гелови за туширање...
Во подобрите хотели ќе добиете и мини бар и секако, услуга во зависност од бројот на ѕвезди што му се доделени на хотелот. Некаде имате на располагање и фен.
Според истражувањето на ABC News за хигиената во хотелите, најдобро ќе ви биде на следното патување да си понесете свој фен за коса.
Микробиологот Чак Герб зел примероци од 9 различни предмети и површини во собите на хотели од различен калибар. Резултатите го збуниле дури и искусниот микробиолог.
На хотелските фенови имало неочекувано многу и различни видови на бактерии.
Причината за ова најверојатно е што собарките и хигиеничарките многу ретко го бришат фенот за коса, па со тек на време на него се насобираат повеќе микроби отколку, на пример, на тоалетот кој редовно се чисти.
Поголемо ниво на бактерии од очекуваното имало и на пластифицираните менија во хотелските соби што неретко се фаќаат со нечисти раце, како и во садовите за ладење пијалаци. Герб на една од нив нашол петпати повеќе бактерии од она што се смета за прифатливо.