Несоницата често се поврзува со стрес, анксиозност и умор, но најновите истражувања покажаа дека причината за инсомнија може да биде генетска.
Меѓународен тим научници откри седум ризични гени што се поврзани со пореметувањето на сонот. Ова откритие може да доведе до откривање на лек за оваа состојба од која патат многу луѓе ширум светот.
Мадона, Џорџ Клуни, Лејди Гага и Ким Катрал отворено зборувале за нивните проблеми со спиењето и несоницата.
Новите сознанија покажуваат дека има различни гени поврзани со несоницата кај мажите и кај жените. До неодамна несоницата се сметаше за психолошки проблем и последица на депресија, жалост или работење во смени.
„Често се сметаше дека причината за инсомнија е ‘во главата’ на пациентот. Ова истражување дава нови перспективи за објаснување на вистинската причина“, вели специјалистот за пореметување на спиењето Еус ван Сомерен од Универзитетот на Амстердам.
Научниците зеле ДНК примероци од 113.000 луше од Холандија и од Велика Британија за да го истражат ова пореметување. Еден од ризичните гени пронајден кај овие луѓе е MEIS1, што и претходно беше поврзуван со пореметувањето на сонот.
Се работи за гени што мутираат и предизвикуваат пореметување. Во рамките на истото истражување било откриено дека одредени гени предизвикуваат анксиозни пореметувања, депресија и лошо расположение.
Научниците сметаат дека ова откритие ќе им помогне подобро да ја разберат инсомнијата како пореметување на невронско ниво и тоа да доведе до создавање на подобри лекови.
