Нова студија покажа дека има сè повеќе докази дека Венера е можеби вулкански активна планета. Ако е навистина така, ова истражување ќе помогне да се објасни како вулканите влијаат на планетарната еволуција и животот во вселената.
Венера често се смета за пеколен близнак на Земјата поради густата атмосфера, високиот притисок и вжештената површина. Венера е обвиена од густ слој облаци кои спречуваат повеќето орбитални станици да продрат низ нив до пеколните услови кои владеат на површината – што предизвика да добие многу помалку внимание од Месечината или од Марс.
Група истражувачи се фокусира на вулканската активност на Венера. Нивното истражување е насочено кон чудните сигнали кои потекнуваат од вулканот Идун Монс.
На научниците одамна им е познато дека површината на Венера е прекриена со надреални кратери, но од Земјата е невозможно да се каже дали и денес од нив тече лава, бидејќи густата и непроѕирна атмосфера на Венера крие сè што се случува на површината.
Благодарение на архивски снимки од постари орбитални станици и експерименти изведени на Земјата, научниците веруваат дека овој вулкан и понатаму е активен и дека еруптира. За потврда на оваа претпоставка научниците нема да чекаат уште долго, во наредната деценија ќе има мисија кон Венера со задача да открие знаци на вулканска активност.
Објаснувањето за трансформацијата на Венера, која некогаш имала океани, а денес тоа е пустош со густа и кисела атмосфера и врела површина, можеби се крие во климатските промени. Проучувањето на вулканот одблизу би помогнало да разбереме зошто Земјата не доживеала слична еруптивна апокалипса.
Засега нема директни докази за вулканска активност на Венера, но постојат индиректни докази како што е висока концентрација на сулфур диоксид, карактеристичен вулкански гас.
Венера по големина е речиси иста со Земјата и има 90% иста гравитација, што значи дека животот на Венера од таа гледна точна би бил одличен.
Американската вселенска агенција НАСА најави дека планира две мисии на Венера со цел да ја истражи атмосферата на планетата.
Новите мисии се одбрани според нивниот научен потенцијал и вредност. Ќе се испитува како планетата се формирала и еволуирала и дали на неа некогаш постоел океан.
Во едната мисија ќе бидат направени и фотографии со висока резолуција со цел да се откријат геолошките карактеристики на планетата, додека втората мисија е за мапирање на површината на планетата за да се проучи геолошката историја и да се истражи зошто се развила толку поинаку од Земјата.
