Вагиналниот исцедок е честа и сосема нормална појава кај жените, но во некои случаи неговата боја или текстура може да укажуваат на одреден здравствен проблем кој не треба да го игнорираме.
Како што предупредуваат гинеколозите, промената на бојата и мирисот на самиот исцедок во повеќето случаи открива инфекција на вагината, но може да биде и знак за промена предизвикана од хормонални или метаболички нарушувања.
Бистриот, бел и кремаст исцедок со кремаста текстура или како белка од јајце се смета за нормален. Исто така, розовиот, црвениот и кафеавиот исцедок е нормален за време на менструацијата, но во други случаи тоа не е добра вест бидејќи тие всушност се знаци на некое крварење. Млечно бел или сив исцедок е чест симптом на бактериска инфекција, најчесто гинеколошка инфекција кај жени во репродуктивна возраст која е предизвикана од нерамнотежа на добри и лоши бактерии. Најчесто се јавува во комбинација со непријатен мирис.
Ако се игнорира и не се лекува на време, бактериската инфекција може да го зголеми ризикот од заразување со сексуално преносливи болести, вклучувајќи кламидија, гонореја, херпес и ХИВ, како и да го зголеми ризикот од инфламаторно заболување на карлицата што влијае на плодноста или може да доведе до предвремено породување кај бремени жени.
Дебелиот, бел исцедок кој малку личи на урда, обично укажува на габична инфекција. Иако габичните инфекции најчесто се мешаат со бактериски инфекции, разликата е во тоа што габичната инфекција не предизвикува непријатен мирис.
Некои жени доживуваат и жолт или зелен вагинален исцедок, а неговите причини може да варираат од сосема нормални до инфекции кои можат да доведат до несакани последици. Доколку исцедокот е со поинтензивна боја и густ и се јавува со непријатен мирис или болка во карлицата, гинеколозите предупредуваат дека постои голема веројатност да се работи за полово пренослива болест. Во овој случај, неопходно е веднаш да се посети лекар.
