Американската вселенска агенција (НАСА) објави видео од слетувањето на нејзиниот ровер Perseverance на Марс, а луѓето веднаш забележаа интересна шара на падобранот што помогна во забавување на спуштањето на Црвената планета.
„Можеби тука ќе го забележите дезенот на падобранот“, рече Ален Чен, водач на тимот за слетување на роверот, по објавувањето на снимката.
„Овие шари ни се корисни при одредување на ориентацијата на падобранот. Исто така, контрастните делови можат да бидат корисни за следење на различни делови од падобранот како што се надувува. Но, се надеваме дека ќе ги инспирираме другите со нашите напори и инженеринг. Затоа, понекогаш оставаме пораки во нашите дела, за да ги најде некој друг. Па, ве покануваме сите да се обидете да ја најдете“, додаде тој, а интернет екипата се фрли на работата и успеа да го прочита тајниот код на падобранот за само неколку часа.
Тие ги заменија црвено-белите шари со нули и единици (речник на бинарниот код) и сфатија дека секој од концентричните кругови на падобранот претставува еден од трите зборови. Нулите и единиците треба да се одделат во низи од 10 знаци, а потоа со додавање на бројот 64 се дава компјутерски ASCII код што претставува одредена буква.
Dare mighty things или „Осмелете се да правите моќни нешта“, е пораката што НАСА ја сокри на падобранот. Оваа реченица прв во говор ја има употребено поранешниот американски претседател Теодор Рузвелт.
„Многу е подобро да се осмелите да правите моќни нешта, да извојувате славни триумфи, иако неуспехот демне, отколку да застанете покрај оние сиромашни души кои ниту уживаат, ниту многу страдаат, бидејќи живеат во сив самрак кој не знае ниту победа, ниту за пораз“, рече Рузвелт во говорот од 1899 година.
НАСА и претходно го користела ова мото во мисиите поврзани со Марс.
„Изгледа дека интернетот го дешифрира нашиот код за шест часа. Ох, интернету, има ли нешто што не можеш да направиш?“, ја потврди точноста инженерот Адам Стелцнер, обраќајќи им се на корисниците на интернет.