Вишиот суд во Белград пресуди дека малолетниот убиец од училиштето „Владислав Рибникар“, неговите родители и училиштето се обврзани да платат отштета на семејствата на жртвите од масакрот од 3 мај 2023 година.
На тужителите им била досудена нематеријална штета за претрпената душевна болка и страв, во износ од 68.000 до 111.000 евра по лице, плус законска камата.
Вкупно, таткото и мајката на убиецот, Владимир и Милијана Кецмановиќ, ќе треба да платат околу два милиони евра.
Судот ги прогласи за одговорни родителите за лошото воспитување, а училиштето за непреземање мерки за безбедност. Наредена е и исплата на судски трошоци. Пресудата може да се оспори со жалба до Апелациониот суд во рок од 15 дена. Оваа одлука се заснова на Законот за облигациони односи, кој предвидува одговорност на родителите, малолетниците и институциите за причинета штета.
Според податоците кои минатата година ги објави српскиот весник Blic, семејството Кецмановиќ поседува значителен имот. Се проценува дека нивниот недвижен имот во Белград вреди најмалку 700.000 евра. Оваа проценка не ја вклучува вредноста на автомобилите и имотот во Ниш и Параќин, како и имотот што не е познат на јавноста.
Владимир Кецмановиќ (татко)
стан во Савски Венац (87 m²), Белград
Автомобил Mercedes, модел 2005 година
Милијана Кецмановиќ (мајка)
стан во близина на Вуков споменик (47 m²) и паркинг простор, Белград
половина стан во Врачар (57 m²), Белград
половина стан во Звездара (91 m²), Белград
половина од семејна куќа во Ниш
половина од помошен објект во Ниш (40 m²)
околу 25 декари земјоделско и градежно земјиште во Ниш и областа Параќин
Автомобил Fiat 500, модел 2017 година
Во текот на судската постапка, на родителите им била изречена привремена забрана за располагање со парите од сметката, а привремено се задржани и паричните средства и хартиите од вредност. Точната сума не е позната.
