И покрај тоа што првата епизода на „Friends“ беше емитувана пред 27 години, популарната серија е актуелна и денес.
Но, дали знаете што се случува кога ќе пробате да ги изгуглате имињата на ликовите од серијата?
Имено, за секој од шесте пријатели, покрај основните информации, при прелистувањето на Google се појавува и анимиран цртеж на нешто по кое се препознатливи или што опишува некои од нивните карактерни црти.
Кога ќе го напишете името Рос Гелер, ликот на Дејвид Швимер, десно се појавува кауч. Кога ќе кликнете на него, екранот на компјутерот се извртува и се слуша Рос како се дере „Врти!“ (анг. Pivot).
Тоа е асоцијација за епизодата кога Рејчел, Чендлер и Рос се обидуваат да го качат новиот кауч на Рос нагоре по скали.
Карактерот на Моника Гелер (Кортни Кокс) е поврзан со нејзината опсесија со чистење. Кога ќе го напишете нејзиното име, се појавува кофа со вода, и кога ќе кликнете на неа, сунѓерчето ќе ѝ го зачисти името.
Кога ќе изгуглате Чендлер Бинг (Метју Пери), се појавува познатата фотелја, а ако кликнете на неа се појавуваат Патката и Пилето, миленичиња што ги чуваа Џои и Чендлер.
Фиби Буфе (Лиса Кудроу) свиреше и пееше во серијата, па покрај нејзиното име се појавува и гитара. Кога ќе кликнете на гитарата, ја слушнете нејзината најпопуларна песна што често ја изведуваше, „Smelly Cat“, а на екранот ќе ви прошета „смрдливо маче“.
Ако го изгуглате ликот на Мет Лебланк – Џои Трибијани - во аголот се појавува пица, а кога ќе кликнете на неа ќе ја слушнете славната реплика: „Џои не дели храна со други“.
И, конечно, кога ќе го напишете името Рејчел Грин (Џенифер Анистон), се појавува нејзината препознатлива фризура од првата сезона. Кликнување на таа фризура ве носи на фотографии од Анистон од времето кога ја носеше токму таа фризура.
